Aurrezagutzak aktibatuta gaia kokatu ondotik, bideoa proiektatuko dugu.

1- Mutiko txikiek soinean zer jartzen zuten?

2- Nola paratzen zituzten soinean?

3- Non barna ibiltzen ziren mutiko txikiak?

4- Etxe bakoitzean behin kantatzen zuten? Zure erantzuna arrazoitu.

5- Txikitxoei nola zirikatzen zitzaien?

6- Zer erran nahi du berriemaleak “majo izaten zen hori!” hitzekin?

7- Mutiko handiagoek ere txintxarriak paratzen zituzten? Zure erantzuna arrazoitu.

8- Joareek zer soinu egiten zuten adierazteko, zer onomatopeia erabiltzen du?

9- Bukaeran aipatzen du txikia zenean zeri begiratzen zion. Azal ezazu.

Bukatzean, denon artean ahoz zuzenduko dugu.

Berriemaleak, joareen soinua adierazteko, zanpa onomatopeia erabiltzen du. Jarraian, koadroan dauden onomatopeia hauek zertarako erabiltzen diren erran behar duzue:

Txin-txin Taup-taup Kukurruku Mauka-mauka Ulu Kas-kas Bolo-bolo Ttipi-ttapa Kurrin-kurrin Kar-kar Danga-danga Tarrat Turrut Dir-dir Plisti-plasta Bor-bor Mara-mara

 

 

Erranahia	Onomatopeia
Irri egin
Uretan ibili
Oinez ibili, poliki ibili
Distira baten soinua
Puzkerraren soinua
Oihal bat haustean egiten den hotsa
Zerriak egiten duen hotsa
Oilarrak egiten duen hotsa
Otsoak egiten duen hotsa
Bihotzaren taupaden hotsa
Jan
Diruaren hotsa
Irakin
Ahoz ahoz ibili
Atea jo
Edan
Elur anitz ari duenean

 

Onomatopeiak landu eta gero, bigarren egitekoari helduko diogu. Horretarako, albistea zertan datzan irakurriko dugu lehenik:

Albistea gertaera bati lotutako berria da, zer gertatu den azaltzeko, nondik norakoak azaltzen dituena. Kazetaritza klasikoan, honako galdera hauei erantzun ohi die albisteak: nor(k), zer, non, noiz eta zergatik. Batzuetan, baita nola galderari ere.

Gaur egun, ordea, ez da ezinbertzekoa beti-beti galdera horiei erantzutea, izan ere, gerta liteke bertze galdera batzuei ere erantzun behar izatea, mamia emateko: noren arabera, zertarako, zenbat…

Egitura lantzeko, lehenbizi, Interneteko edozein albiste hartu eta denon artean ahoz atzemandako ezaugarriak aipatuko ditugu. Hori egin eta gero, ikusitako atalak azpimarratuta dituen webgune honetako hiru adibide ikusiko ditugu.

Azkenik, orain arte ikusitakoa birpasatuko dugu eskema honen bidez:

 

Izenburua edo titularra

(letra handiagoz eta letra beltzez)

Data eta nork idatzi duen

(letra txikiz, ezkerrean)

Azpititulua

Testuko ideia nagusia biltzen du. Letra beltzez ematen da.

Gorputza

Nor(k), zer, non, noiz, zergatik eta nola azaltzen da, garrantzitsuenetik hasita.

Argazkia

Argazki oinean azaltzen da zer agertzen den argazkian eta argazkia nork egin duen. Letra txikiagoz.

 

Horrez gain, ez ahaztu:

• Datu zehatzak eman
• 3. pertsonan idatzi
• Ez eman iritzirik

Albisteen ezaugarriak eta egitura landu ondotik, bikoteka, bideoan ikusitakoa albiste bihurtuko duzue. Idatzi eta gero, zuen albistea gelakideei irakurriko diezue.