Aurrezagutzak aktibatu eta gero, bideoa proiektatuko dugu entzunaren ulermena lantzeko.

Bakarka entzunaren ulermena lantzeko galderei erantzunen diezue:

1- Berriemalea noiz joan zen soldadu?

2- Non egon zen soldadu? Zenbat tokitan?

3- Zenbat denbora eman zuen soldaduskan?

4- Nola joan zen Uretatik Iruñera?

5- Eta Iruñetik Afrikara?

6- Nolakoak ziren bere trena eta bagoia?

7- Trenean non egiten zuten lo?

8- Nola erraten du “pakete batzuk”?

9- Une hartan gerrarik zegoen?

10- Soldadu egoteagatik dirurik jasotzen zuten? Zenbat?

Talde handian, denon artean zuzenduko ditugu erantzunak.

Hasi baino lehen, Ureta mapan kokatuko dugu gelako arbel digitalaren laguntzaz. Nondik abiatu zen ikusita, Afrikarainoko ibilbidea irudikatuko dugu.

Gero, zuen Chromebookekin, Nafarroan Pirinioetatik Iruñera joateko zegoen trenari buruz ikertuko duzue. Horretarako, lauzpabortz laguneko taldeak eginen ditugu eta hitz gako posibleak pentsatuko dituzue lehenbizi, eta, gero, dagoen informazioa irakurri eta egokiena bereiziko duzue. Ondotik, Driven karpeta bat sortu eta taldekideekin partekatuko duzue, informazioa txukun paratu eta irakasleari bidaltzeko.

Egin beharreko lanean, trenari buruz gutxienez honako informazioa bildu beharko duzue:

• Trenari nola deitzen zitzaion.

• Zein zen ibilbidea.

• Noiztik noiz arte ibili zen.

• Zer garraiatzen zuen.

• Egun bide hori erabiltzen den.

Argazki batzuk ere bilatuko dituzue, lana osatzeko.

Bigarren jardueran, eta aurrekoaren jarraipen moduan, Nafarroan dauden Bide berdeen inguruko ikerketa egin eta triptiko bat sortuko duzue. Horretarako, lehen jarduerako taldeak mantenduko ditugu eta Nafarroako Bide berdeen inguruan informazioa lortu, moldatu, antolatu eta triptiko bat eginen duzue.

Triptikoak nola egiten diren jakiteko, lehenagotik gelara triptikoak ekarriko dituzue, gero duten forma aztertu eta gustukoen duzuen egitura kopia dezazuen emandako gaiarekin. Eredu gisa, dena den, honako triptikoak ere balia ditzakezue:

Jarraian ageri den aurkezpenean, triptiko bat egiteko hainbat azalpen ageri dira 8. orrialdetik aitzina: diseinatzeko dauden programak (11. or.), tutorialak eta txantiloiak (12. or.), eta abar.

http://www.bizkaia.eus/home2/archivos/DPTO4/Temas/aurkezpena%20(kartelak%20eta%20triptikoak).pdf?hash=9b351bfb34f8aad403ccd9cbb07f6dfd&idioma=CA

Behin triptikoak aztertuta eta dauden baliabideak ikasleen eskura paratuta, taldeka Nafarroako Bide berdeei buruzko ikerketa eginen duzue lehenbizi. Horretarako, informazioa bilduko duzue, sailkatu, moldatu… Osatzeko argazkiak edota mapak ere bilatu eta prestatu beharko dituzue.

Testua prest duzuenean, triptikoa diseinatu beharko duzue. Eskuz zirriborro bat eginen duzue eta erabaki zer paratu, non paratu, zer kolorerekin, zer argazkirekin, zer izenbururekin, eta abar. Ondotik, aukeran eman zaizkizuen programen artean bat aukeratu eta diseinatzeari ekinen diozue.

Zuen eskualdean Bide berderik badago, horren ingurukoa egin dezakezue eta eskualdeak dituen aukerak azaldu, kanpotik heldu den edonork jakin dezan bertan zer egiten ahal duen.

Bukatzeko, aukera paregabea litzateke Gorputz Heziketako irakaslearekin Bide berderen batean bizikletaz ibiltzera joatea.

Denak bukatzean, ikastetxeko webgunera igotzen ahal ditugu.